In spazi vital ed economic segir è la premissa per qualitad da viver e bainstar. Segirtad absoluta na datti dentant betg. Eveniments natirals pon periclitar umans e valurs materialas sco er la productivitad economica d’in pajas. Quai mussan eveniments, sco per exempel las inundaziuns da l’onn 2005. Cun realisar la strategia dal 2018 segirescha la Svizra ses spazi vital ed economic a lunga vista.
La strategia dal 2018 «Gestiun dals ristgs da privels da la natira» remplazza la strategia dal 2004 «Segirtad encunter ils privels da la natira». Elements cumprovads da la strategia dal 2004 vegnan persequitads e sviluppads enavant, sco per exempel il management integral da ristgs. En la strategia actualisada definescha la PLANAT las finamiras da gestiunar ils ristgs da privels da la natira e declera, co che questas finamiras pon vegnir cuntanschidas. Per sa proteger adequatamain da privels da la natira sco inundaziuns, granella, stemprads u terratrembels e per reducir ils effects d’eveniments sin ina mesira supportabla na sto la Svizra betg be augmentar sia forza da resistenza. Impurtant èsi er ch’ella daventia svelt puspè capabla d’agir suenter in eveniment. Ultra da quai sto la Svizra esser pronta e capabla da s’adattar a circumstanzas midadas. A quellas appartegnan per exempel undas da chalur u pli e pli er grevas precipitaziuns.
La strategia actualisada è adattada ad autras strategias naziunalas ed internaziunalas – sco «Svilup durabel 2016-2019» da l’Uffizi federal da svilup dal territori, «Adattaziun a la midada climatica 2012/2014» da l’Uffizi federal d’ambient u er «Sendai Framework for Disaster Risk Reduction» da l’ONU.
La strategia privels da la natira 2018 sa drizza a tut tgi ch’influenzescha cun acziuns e decisiuns la gestiun dals ristgs da privels da la natira. Tar quels s’audan tranter auter politicras e politichers sco er autoritads sin tut ils stgalims, planisadras e planisaders, proprietaris d’edifizis ed er assicuranzas. Mintga persuna, mintga instituziun porta ristgs da privels da la natira – per sa sezza sco er per la communitad. Il medem mument influenzeschan tuts ils ristgs cun lur agir e lur cumportament. Per cuntanscher las finamiras visadas èsi impurtant che tuts ageschian communablamain ed a moda solidarica.
- La Svizra gestiunescha ils privels da la natira considerond ils ritgs
- La Svizra viva ina cultura da ristgs cumplessiva
- Tuts participeschan al management integral da ristgs
- La gestiun dals privels da la natira succeda a moda solidarica
- La savida davart ils privels da la natira ed ils ristgs è actuala ed accessibla
- La gestiun dals ristgs respecta tuts aspects da la durabilitad